ეროვნული ლიგის 36-ე ტურის ბოლო 2 შეხვედრა დღეს 16:00 საათზე დაიწყება. ბათუმის “დინამო” “ლოკომოტივს” ესტუმრება, თბილისის “დინამო” კი “ვიტ ჯორჯიას” მიიღებს. “ვიტ ჯორჯია” უკვე გავარდნილია, თუმცა რამდენიმე ტურის წინ ბათუმელებს მედგარი წინააღმდეგობა გაუწიეს და ქულები დააკარგვინეს. იმ შეხვედრის ერთ-ერთმა გმირმა, მეკარე ლევან ისერგიშვილმა Fanebi.com-თან ისაუბრა.
“სამწუხაროდ, “ვიტ ჯორჯია” ეროვნული ლიგიდან გავარდა, მაგრამ ეს არ ნიშნავს ფეხბურთის დასასრულს. მომავალ წელს გუნდი აუცილებლად ეცდება უკან დაბრუნებას, უფრო მეტად მოტივირებული. ასევე, ყველაფერს გავაკეთებთ, რომ ხალხის სიმპატია დავიმსახუროთ და მებრძოლი გუნდის სახელით დავტოვოთ ეროვნული ლიგა. სამართლიანობის თვალსაზრისით ვეცდებით, “დინამოსაც” იგივე და კიდევ უფრო დიდი წინააღმდეგობა გავუწიოთ, რაც ბათუმში ვაჩვენეთ. ეს ისეთი თამაშია, ღმერთმა უნდა გადაწყვიტოს ჩემპიონის ბედი” – განაცხადა ისერგიშვილმა.
თუ თბილისის “დინამო” “ვიტ ჯორჯიას” დაამარცხებს, ქვეყნის ჩემპიონი მეჩვიდმეტედ გახდება.
