თბილისის “დინამოს” უკვე ყოფილი ფეხბურთელი, ლაშა პარუნაშვილი კარიერას “ესბიერგში” გააგრძელებს. ამის შესახებ დანიური კლუბის ოფიციალური გვერდი იტყობინება.
23 წლის ნახევარმცველს იანვარში თბილისურ გუნდთან დადებული ხელშეკრულების პერიოდი დაუმთავრდა. შესაბამისად, ლაშა “ესბიერგში” თავისუფალი აგენტის სტატუსით მივიდა. მან ორწელიწად-ნახევრიან კონტრაქტს მოაწერა ხელი. ახალი ხელშეკრულების თანახმად, პარუნაშვილი 2019 წლის 30 ივნისამდე ითამაშებს ნახსენებ გუნდში.
აქვე გეტყვით, რომ “ესბიერგში” კიდევ ორი ქართველი, ბუდუ ზივზივაძე და ოთარ კაკაბაძე გამოდან.