„დინამოსთან“ მატჩის გამო „გაბალა“ უეფა-სგან დისკვალიფიკაციას მიიღებს

უეფა აზერბაიჯანულ „გაბალას“ თბილისის „დინამოსთან“ უეფა-ს ევროპის ლიგის პირველი საკვალიფიკაციო ეტაპის განმეორებით მატჩში განვითარებული მოვლენების გამო დასჯის. როგორც აზერბაიჯანული პორტალი azerisport.com-ი წერს, უეფა „გაბალას“ სტადიონს დისკვალიფიკაციას დაუწესებს.

აქედან გამომდინარე, ევროპის ლიგის მეორე საკვალიფიკაციო ეტაპის საშინაო მატჩის ჩატარება კლუბს სხვა ქალაქში მოუწევს. ამის გამო „გაბალა“ უკვე ბაქოს „ნეფტჩის“ დაუკავშირდა და „ბაქსელ არენას“ გამოყოფა სთხოვა, რომელზეც აზერბაიჯანული კლუბი 23 ივლისს სერბულ „ჩუკარიჩკისთან“ თამაშს გეგმავს.

შეგახსენებთ, რომ „დინამოსთან“ მატჩში ადგილობრივმა გულშემატკივრებმა რამდენიმე ბანერი გაშალეს, რომელზეც რამდენიმე ქართული ქალაქი აზერბაიჯანის ტერიტორიად მოიხსენიეს. გარდა ამისა, „გაბალას“ ქომაგებმა საქართველოს დროშაც დაწვეს.