უეფას ევროპის ლიგის მესამე საკვალიფიკაციო ეტაპზე ბაქოს “ნეფთჩისა” და საჩხერის “ჩიხურას” შორის გამართული მატჩის (0:0) მიმდინარეობისას გუნდების ქომაგებს შორის კონფლიქტი მოხდა.
როგორც azerisport-ი იუწყება, სტადიონზე დამსწრე “ჩიხურას” გულშემატკივრებმა პირველი ტაიმის ბოლოს ტრიბუნაზე გამოფინეს რუკა, რომელზედაც კახი და ზაქათალა საქართველოს შემადგენლობაში იყვნენ შეყვანილნი. ცნობილი ფაქტია, რომ აზერბაიჯანელ მეცნიერებსაც კი, საინგილო ანუ აღმოსავლეთ კახეთი აზერბაიჯანის ისტორიულ-გეოგრაფიული ოლქი ჰგონიათ, თუმც ეს ტერიტორია შაჰ-აბასის შემოჭრის შემდეგ დაკარგეს ქართველებმა და აქ დაღესტნური ტომები დასახლდნენ. კახი და ზაქათალა თანამედრეოვე აზერბაიჯანის ნაწილებია.
ქომაგებმა ერთმანეთის მიმართულებით ბოთლების სროლა დაიწყეს, მალევე სიტუაციის განმუხტვა სამართალდამცავებმა შეძლეს.
azerisport-ის ცნობით, მატჩის შემდეგ “ჩიხურას” მთავარმა მწვრთნელმა სოსო ფრუიძემ მომხდარის გამო მოიბოდიშა და განაცხადა, რომ ინციდენტში მონაწილე პირები ქართული კლუბის ნამდვილი ქომაგები არ იყვნენ.